1 Kor 13 Vers 1: Al sou ek die tale van mense en engele spreek, en ek het nie die liefde nie, dan het ek ‘n klinkende metaal of ‘n luidende simbaal geword.
Vers 2: En al sou ek die gawe van profesie hê en al die geheimenisse weet en al die kennis, en al sou ek al die geloof hê, sodat ek berge kon versit, en ek het nie die liefde nie, dan sou ek niks wees nie.
Vers 3: En al sou ek my goed uitdeel, en al sou ek my liggaam oorgee om verbrand te word, en ek het nie die liefde nie, dan sou dit my niks baat nie.
Vers 4: Die liefde is lankmoedig en vriendelik; die liefde is nie jaloers nie; die liefde praat nie groot nie, is nie opgeblase nie.
Vers 5: Handel nie onwelvoeglik nie, soek nie sy eie belang nie, word nie verbitterd nie, reken die kwaad nie toe nie.
Vers 6: Is nie bly oor die ongeregtigheid nie, maar is bly saam met die waarheid.
Vers 7: Dit bedek alles, glo alles, hoop alles, verdra alles.
Vers 8: Die liefde vergaan nimmermeer; maar die profesië - hulle sal tot niet gaan; of tale - hulle sal ophou; of kennis - dit sal tot niet gaan.
Vers 9: Want ons ken ten dele en ons profeteer ten dele.
Vers 10: Maar as die Volmaakte gekom het, dan sal wat ten dele is, tot niet gaan.
Vers 11: Toe ek ‘n kind was, het ek gepraat soos ‘n kind, gedink soos ‘n kind, geredeneer soos ‘n kind; maar nou dat ek ‘n man is, het ek die dinge van ‘n kind afgelê.
Vers 12: Want nou sien ons deur ‘n spieël in ‘n raaisel, maar eendag van aangesig tot Aangesig. Nou ken ek ten dele, maar eendag sal ek ten volle ken, net soos ek ten volle geken is.
Vers 13: En nou bly geloof, hoop, liefde - hierdie drie; maar die grootste hiervan is die liefde. (Die hele Bybel, met nog 440 ander onderwerpe gratis op die Internet. Gaan na https://dieversteekteverse.blogspot.com Indien u nie dadelik by die boek uitkom nie, soek eers: BLOG SEARCH ENGINE en dan die boek. )
Geen opmerkings nie:
Plaas 'n opmerking